Сместен на карпест гребен на брегот на Охридското езеро со поглед кој се отвора врз целата езерска шир манастирот Свети Наум долго време ги плени срцата на патниците кои бараат утеха и природна убавина.
Оваа идилична дестинација, каде и денес е гробот на почитуваниот христијански светител и просветител, Свети Наум Охридски, нуди уникатен спој на историја, духовност и неверојатни пејзажи кои ги повикуваат посетителите од целиот свет…
До Свети Наум можете да дојдете со автомобил, автобуски линиски превоз од Охрид или со брод или друго пловило кои доаѓаат до пристаништето изградено веднаш под манастирот.
Духовна оаза !
Зачекорувањето во просторот на манастирскиот комплекс Свети Наум наликува на тргнување на патување низ времето. Комплексот, кој се состои од илјадалетен манастир и низа цркви, му оддава почит на неговиот истоимен патрон, Свети Наум, кој одигра клучна улога во христијанизацијата и образованието на словенскиот народ во текот на 9 век.
Верниците, почитувачите на неговото дело и љубителите на историјата природата се привлечени од комплексот со цркви градените изградени во византиска архитектура и религиозни артефакти, кои стојат како сведоштва за минато време.
Манастирот кој се издига високо на карпест гребен повеќе од 1000 лета сведочи за делото на Свети Наум Охридски. Во средина се издигнува манастирската црква со своите прекрасни куполи, фрескоживописот и вечното почивалиште на Свети Наум кое е во посебна просторија на манастирската црква и каде верници од цел свет и од различни вери доаѓаат на поклонение и молитва.
Но, не е само историското значење што го прави Свети Наум светилиште за душата. Местото е исто така дом на кластер природни извори од кои извира реката Црн Дрим, каде кристално бистрите води бликаат од под површината на земјатаи создаваат мало езерце кое плени со својата чистота и неверојатните бои на водата кои заедно со зеленилото прават еден природен спој кој сите кои го посетиле го окарактеризирале со еден збор : РАЈ !
Легендите поврзани со овие извори со векови се прераскажуваат низ народот, при што некои веруваат дека поседува лековити својства, а други сметаат дека е симбол на чистота и божествена интервенција. Како и да е, ако погледнете од мостот под кој местото каде малото езерце истекува во Охридско Езеро, ќе забележите дека дното е прекриено со метални парички од валути скоро од цел свет, кои луѓето ги фрлаат тука и си замислуваат желба.
Низ изворите можете да се возите со чамец, кој го движи веслач и да го обиколите двете островчина кои се наоѓаат внатре во самите извори, каде можете да уживате во глетките на природата и живиот свет и тишината кои овде ќе ве опкружуват , или да одморите во некој од рестораните од комплексот, секој со свој поглед на езерцето и изворите или на езерската шир на Охридското езеро.
Околу манастирот има и две плажи прекриени со ситен жолт песок. На првата плажа се наоѓа и истекот на изворите, што пак дава дополнителна атрактивност, посебно за оние кои сакаат да се пуштаат низ ладните изворски води во топлите езерски. Оваа плажа има и прекрасно уреден парк кој туристите го користат за сончање или одмор под сенките од дрвата.
Втората плажа која можете да ја посетите тука е во состав на авто кампот Васко Карангелески, попознат како „Воен Камп“. Оваа плажа многумина ја оценуваат како една од најубавите на брегот на Охридското Езеро. Со кристално чисти води… мек жолт песок… и прекрасни пејсажи, плажата во кампот плени со мирот и спокојот кој го нарушува само детскиот џагор и по некое пловило.
Интересно е да се напомене дека оваа плажа е на амата гранична линија со Албанија, па на крајот е поставена ограда која означува дека туристите не треба да се движат натаму кон граничната зона.
Во свет често исполнет со метежот и вревата на модерниот живот, Свети Наум нуди спокој и мир каде што шепотењата од минатото хармонично се мешаат со смирувачките звуци на природата. Без разлика дали некој бара духовно просветлување, историски сознанија или едноставно момент на спокојство покрај брегот на езерото, Свети Наум стои како доказ за трајната привлечност на природното и културното наследство на Македонија.
