Турската ривиера го зазема најубавиот дел не само на Евроазија туку и на Европа. Туркије, земја со морски брег долг 7.200 километри и 300 сончеви дена во годината, на странските и на домашните гости им нуди мешавина на култура, историја и плажа, луксузни хотели и разновиден свет на флора и фауна, пишува Анадолу.
Сето ова ја прави турската ривиера најсовршено место за одмор. Од Медитеранот до егејскиот брег се протегаат заливи, песочни и каменливи плажи, пештери со археолошко богатство, сведоци на древните цивилизации. Поради своите плажи Туркије е на самиот врв на земји со најголем број сини знамиња – меѓународен сертификат за стандард на квалитетот за заштита на околината на морето и брегот. Најубавите турски плажи се вистинска инспирација за секој што ги сака бањањето и уживањето во сонцето…
– Капуташ – плажа од светските насловни страници
Анталија е една од најдобро оценетите дестинации за одмор поради знаменитостите што се наоѓаат од Аспендос до Мира (Ликија), Сиде и Перге, заедно со брегот, тиркизната боја на водата, мирните заливи и спортските активности. По должината на анталиската ривиера се наоѓаат 231 плажа што имаат сертифицирано сино знаме.
Некои од плажите се долги со километри, а други се мали, скриени бисери меѓу планинските и ридските засеци. На патот Каш-Калкан се наоѓа плажата Капуташ, исклучително убава плажа, позната по песокот и тиркизното море. Оваа мала плажа е прогласена за една од 50 најубави плажи во светот.
![](https://www.aa.com.tr/uploads/userFiles/78d750d5-b1ec-4b83-8639-327d8a85bd2a/01%20temmuz%202023%2F20230720_2_59583498_91179654.jpg)
Заливот Андреа Дорија, именуван по џеновскиот адмирал Андреј Дориј, се наоѓа на патот Финике-Демре и тоа е една од најфасцинантните плажи во Анталија. Оваа сликовита плажа опкружена со карпи, макија (средоземна џбунеста вегетација) и маслинови дрвја, ја посетуваат морските желки и средоземната фока мечка.
Плажата Патара, втора најдолга плажа во Туркије, се протега на 14 километри и се наоѓа во подрачјето на Анталија. Таа претставува едно од најважните подрачја за леглата на морските желки во Туркије. Поради тоа, од 15 мај до 15 септември и посетителите и морските желки наизменично ја користат плажата Патара.
– Синиот Бодрум
Бодрум без сомнение е речиси најпопуларна дестинација за одмор во овој дел од светот поради морето и брегот што е вистински избор за летниот одмор.
Плажата Ѓумбет е најблиску до центарот на Бодрум и таа нуди сѐ – од бањање, излет со брод, нуркање или едрење.
![](https://www.aa.com.tr/uploads/userFiles/78d750d5-b1ec-4b83-8639-327d8a85bd2a/01%20temmuz%202023%2F20230720_2_59583498_91179662.jpg)
Плажата Битез има полукружен облик, опкружена е со насади на агруми и маслинки, кои растат покрај рестораните и кафулињата.
Плажата Ѓолтуркбуку е место на кое деноноќно се излегува и се случуваат музички настани во атрактивните клубови што се наоѓаат на плажата.
– Измир
Прво нешто што асоцира на Измир, град сместен јужно од Чанаккале, е Чешме, најпопуларната градска туристичка дестинација. Плажите Илиџа и Алачати се ѕвезди на ова поднебје познато по златно-жолтиот песок.
![](https://www.aa.com.tr/uploads/userFiles/78d750d5-b1ec-4b83-8639-327d8a85bd2a/01%20temmuz%202023%2F20230720_2_59583498_91179659.jpg)
Алачати се наоѓа на 13 километри од центарот на Чешме и има најчисти плажи. Уште едно популарно место за одмор е плажата Илиџа, чие море го загреваат плитките, термални изворски води.
![](https://www.aa.com.tr/uploads/userFiles/78d750d5-b1ec-4b83-8639-327d8a85bd2a/01%20temmuz%202023%2F20230720_2_59583498_91179660.jpg)
– Зелен рај
Брегот на Асос во областа Чанаккале има малку помирно море. Двете најпознати плажи во регионот се плажата Асос Сокакагзи и заливот Кадирга, опкружени со маслинови дрвја од двете страни. Кога се зборува за Чанаккале, не треба да се заборават двата прекрасни острова – Бозџаада и Ѓокчеада.
![](https://www.aa.com.tr/uploads/userFiles/78d750d5-b1ec-4b83-8639-327d8a85bd2a/01%20temmuz%202023%2F20230720_2_59583498_91179658.jpg)
Плажата Ајазма во Бозџаада е една од најубавите плажи на Егејското Море, а плажата Ајдинџик, долга 1.200 метри на островот Ѓокчеада, е најдобро оценета природна плажа што ја посетуваат и ја препорачуваат сурферите.
извор: Анадолу.
фото: Анадолу.